Bílaklúbbur Akureyrar

Bæjarbókasafnið í Þorlákshöfn hefur nú opnað nýja og ansi áhugaverða sýningu í Galleríinu Undir Stiganum. Að þessu sinni verður reynt að varpa ljósi á feril torfærukappans Gísla Gunnars Jónssonar sem hefur hampað mörgum titlum og bikurum í gegnum tíðina. Sýndir verða bikarar Gísla, myndir frá keppnum, bílamódel og greint frá ferli hans í torfæruakstri. Gísli hefur keppt í fjölmörgum keppnum síðan 1991 og er margfaldur Íslandsmeistari og fyrrverandi heimsmeistari. Sýningin stendur yfir allan febrúarmánuð.

Nú á laugardaginn var Vetraríþróttahátíð ÍSÍ formlega sett í Skautahöllinni á Akureyri. Þar voru forsvarsmenn allra íþróttafélaga sem taka þátt í hátíðinni ásamt keppendum sem valdir hafa verið á Vetrarólympíuleikana í ár. Af því tilefni viljum við benda á heimasíðu Vetraríþróttamiðstöðvar Íslands en þar er hægt að fylgjast með öllum viðburðum hátíðarinnar. Heimasíða Vetraríþróttamiðstöðvarinnar er www.vmi.is

Sjóðheitar myndir frá torfærukeppni B.A. árið 1986 hafa nú bæst í okkar frábæra myndasafn. Fullt af flottum nöfnum og torfæran á blússandi uppleið. Þarna gefur á að líta Davíð Sigurðsson, Bergþór Guðjónsson, Heiðar Jóhannsson, Gunnar Hafdal, Guðbjörn Grímsson, Einar Gunnlaugsson, Steina Vals og marga fleiri snillinga. Minnum annars á setningu Vetraríþróttahátíðar á morgun - góða helgi!

Hið árlega Þorrablót Tíunnar verður haldið föstudaginn 5. febrúar næstkomandi og fer fjörið fram í Strandgötu 53, gamla Ford umboðinu. Húsið opnar kl. 19:00.-  og borðhald hefst kl. 20:00.-  Veitingar munu verða á vegum Bautans og er miðaverð einungis 2.000.- krónur fyrir meðlimi Tíunnar en aðrir geta keypt sig inn á krónur 3.500.- Nánari upplýsingar um blótið má nálgast á heimasíðu Tíunnar.

Á heimasíðu AÍFS er nú að finna skemmtilegar fregnir af framkvæmdum á Reykjanesi en þar var í gær tekin fyrsta skóflustungan af nýju og glæsilegu ökugerði. Það er Nesbyggð ehf sem sér um framkvæmdir á staðnum og samkvæmt upplýsingum frá þeim á fyrsti áfangi svæðisins að vera tilbúinn strax í vor.

Lesa meira

Útvegun varahluta er okkur fornbílaáhugamönnum hugleikið efni enda oft sem þarf að panta slíkan varning utan okkar yndislegu eyju. Stærstu vöruhús og seljendur varahluta gefa flest út pöntunarlista sem þeir senda viðskiptavinum og í kvöld biðjum við menn að rífa með sér pöntunarbæklingana sína og þá sér í lagi frá þeim fyrirtækjum sem þeir hafa verið að panta frá. Þá er ætlunin að skiptast á reynslusögum varðandi þjónustu, verð og flutning og sjá þá t.d. hverjir smyrja og hverjir taka í þurrt.

Lesa meira

Nú blæs stjórn EY-LÍV til veislu á Akureyri dagana 13.-14. febrúar n.k. en þá halda þeir stórsýninguna Vetrarsport 2010 í Boganum. Sýningin mun bjóða upp á allt það stærsta, mesta og besta í vetrarsportinu okkar og verða sýningarbásar frá helstu jeppa- og snjósleðaumboðum landsins ásamt fjölda sýningartækja frá einstaklingum.

Lesa meira

Í dag hefjast prófanir Formúlu 1 liðanna fyrir komandi tímabil en allur akstur hefur nú verið bannaður frá lok síðasta móts. Mercedes, Ferrari, McLaren, Sauber, Williams, Toro Rosso og Renault hafa nú frumsýnt keppnisbíla ársins og munu önnur lið klára frumsýningar sýnar á næstu dögum.

Lesa meira

Í framhaldi af kynningarfundi Loga og Ragnars á miðvikudagskvöldið minnum við þá félagsmenn sem vilja styðja þá í framboði sínu á prófkjör Samfylkingarinnar sem nú er hafið á netinu. Prófkjörið er öllum opið hvort sem þeir eru flokksbundnir eða ei. Til þess að taka þátt getur þú smellt hér og stutt þessa öðlinga til starfa í þágu bæjarins.

Undirbúningur fyrir Vetraríþróttahátíð ÍSÍ 2010 stendur sem hæst en hátíðin fer fram á Akureyri þar sem Vetraríþróttamiðstöð Íslands er staðsett. Hátíðin verður sett laugardaginn 6. febrúar í Skautahöllinni með mikilli sýningu þar sem fram koma m.a. hæfileikaríkir iðkendur í listhlaupi en Skautahöllin fagnar einmitt 10 ára afmæli sínu á þessu ári. Ólympíufararnir munu heiðra samkomuna og munu síðan halda utan til Vancouver í Kanada til þátttöku í Vetrarólympíuleikunum.

Lesa meira

Í kvöld munu þeir félagar Logi Már Einarsson arkítekt og Ragnar Sverrisson stórkaupmaður heimsækja okkur - en þeir eru eins og gefur að skilja mættir til þess að reyna smala sér atkvæðum fyrir prófkjör Samfylkingarinnar sem fram fer um næstu helgi. Við bjóðum þá að sjálfsögðu hjartanlega velkomna til okkar enda annálaðir öðlingar báðir tveir.

Lesa meira

Þónokkur umræða hefur verið undanfarið á spjallvefjum bílaáhugamanna vegna misjafns verðs á fornbílatryggingum og skilmálum sem þeim fylgja. Af því tilefni viljum við benda á samninga þá sem gilda hjá Sjóvá og VÍS fyrir félagsmenn Bílaklúbbs Akureyrar til þess að spara mönnum bæði tíma og peninga í tilboðsferli við félögin. Allir meðlimir félagsins njóta þessara kostakjara sem sjá má á linkum félaganna gegn framvísun félagsskírteinis. Þeir sem enn eru að vandræðast með þetta geta sótt um aðild í Bílaklúbbi Akureyrar hér.

Lesa meira